Дарҳақиқат дунёдаги мусулмонларнинг адади нашрларда турлича берилмоқда. Яқинда газеталарнинг бирида бундан ўттиз йил аввалги ҳисоб бўйича 800 миллион нафар деб эълон қилинган. Ваҳолангки тарих фанлари номзоди З. Мунавваров: “Азия и Африка сегодня” (Москва) журналининг 1989 йил 10 – сонида босилган тадқиқотда ер юзида мусулмонларнинг сони 1 миллиард 145 миллион деб кўрсатади. Бу рақам Яман пойтахти Санно шаҳрида бўлиб ўтган халқаро илмий  анжуманнинг якуний ҳужжатларидан олинган. Яна бир илмий нашр куррамизда Ислом динидагилар сонини 1954 йилда 450, 1978 йилда 907 миллион бўлганини ёзади. Энг сўнги маълумотларга кўра, бугунги кунда ер юзи аҳолисининг 1 миллиард 377 миллион нафари Ислом динига эътиқод қилади. Уларнинг турли мамлакатлар бўйича жойлашуви қуйидаги жадвалда акс этган. Жадвал Москвадаги “Славянский дом книги” нашр этган “Дунё мамлакатлари” маълумотномаси (2003), “АТС - пресс”нинг “Дунё атласи” китоби (2003), “Мъсл” нашриётининг “Дунё аҳолиси” маълумотномаси, шунингдек, интернет материаллари асосида тузилди.
 Мазкур жадвал дунёдаги барча мамлакатларни қамраб олмаган. Бу ўринда кўрсатилмаган мамлакатларда ҳам мусулмонлар яшайди. Шу боис ер юзида мусулмонлар сони биз келтирган якуний ададдан кўп бўлиши табиийдир.