* * *
Эй дўст!
Учиб чиқар бир қуш ўз уясидан,
Унга қайтиб кирмас, қандай қушдир у?
— Нақд яхши ҳамиша насиясидан,
Уни “Сўз” дейдилар, жавобимиз шу!

 * * *
Эй дўст!
Тарозига солиб айтдим ҳар бир сўзни,
Унутмадим, кескир нигоҳ, ўткир кўзни.
Қуюнларнинг ниятидан хабарим бор,
Тиконларнинг нишларида кўрдим ўзни.

 * * *
Эй дўст!
Аллоҳга таваккул қилдик жонимизни,
Ҳалоллаб едик бир бурда нонимизни.
Даламизда деҳқон мисол бедормиз,
Пахта, буғдой ўраган ҳар ёнимизни.

 * * *
Эй дўст!
Менинг наслим билар бўлса сўзимга боқсин,
Менинг бирла бир дарёда чўмилсин, оқсин.
Шаҳар либосимни ғийбат қилиб ўтирмай,
Қалбим билан тоққа чиқсин, гулханлар ёқсин.

 * * *
Эй дўст!
Ўз уйинг ичида бўй берган низо
Ташларга чиқару берар акс-садо.
Боғда кўтарилар бехосдан тўзон,
Йўлларга сочилиб кетади хазон.

 * * *
Эй дўст!
Чўлдаги чўпонга учради Хизр:
“Тила тилагингни, чўпон, не зарур?”
Чўпон дер: “Соғиндим бола-бақрамни,
Тонггача сурувга, бобо, қараб тур”.

 * * *
Эй дўст!
Бу гўша, шу макон, шу юрт, шу Ватан,
Майли, юрагимга қадасин тикан.
Хокига айланай, ўша тиканлар
Тиллашох гулларга дўнар дафъатан!

 * * *
Эй дўст!
Қамишзор қушлари чуғурлар бетин,
Уларнинг сасларин эшитдим секин:
— Бугун икки қушча нобуд бўлибди
Тузоқдаги донни ўйлашиб текин...

 * * *
Эй дўст!
Сиртимдан сипою ичдан бедорман,
Кундуз хуррамману тунда абгорман.
Жийда гули гўзал — кўзим оладир,
Кўп ҳидлаб юбордим, дили беморман.

 * * *
Эй дўст!
Қашқир ваҳшийлигин сўзламаган ким,
Эшитдим турфа хил баҳоларини.
Лекин чин қашқирни кўринглар дедим
Эмизаётган кез болаларини...

 * * *
Эй дўст!
Куч бир ён чорлайди, ақл-чи, бир ён,
Бир ён гулхонаю бир ён гўристон.
Билак кучи билан тутмадим сичқон,
Билак кучи билан ўйнатдим арслон.

 * * *
Эй дўст!
Оламда не мавжуд турар турланиб,
Бирда янгиланиб, бирда кирланиб.
Ёз-қиш лаш-лушларга тўлди сой бўйи,
Лекин ювиб кетди кўклам сел келиб.

 * * *
Эй дўст!
Эр-аёл бир умр эрур ёнма-ён,
Улар айролиғин қилма намоён.
Бири Ғарбга кетса, бири Шарқ томон,
Ўртада тугайди жаннати даврон.

* * *
Эй дўст!
Аёл боши эркак бўлди,
Қора сочи телпак бўлди.
Болаларин улғайтиргач,
Неварага эрмак бўлди.

* * *
Эй дўст!
“Аёлга сир айтма!” деганди отам,
Аёлга сир айтиб... синаб кўрдим ҳам.
Боламга не дейин? Дейманки: “Ақлим
Отамнинг ақлидан эмасдир ўктам!”

* * *
Эй дўст!
Сен қанча жим юрсанг, бу шунча яхши,
Сўзламоқ эмасдир бу даврон нақши.
Ихтиёрсиз куйлаб юборгум, нетай,
Тоғдан тушиб келган мен — далли бахши.

* * *
Эй дўст!
Сичқон тирик. Қопқон ўлик.
Тирик ўликдан луқма тилар.
Ўлик тирилар. Тирик
Ўликка айланар.

* * *
Эй дўст!
Қора сел бақани оқизиб борар,
У деди: — Дарёни орзу қилгандим.
Лайлак этакларда ризқ териб юрар.
У дер: — Келишингни кутиб тургандим.

* * *
Эй дўст!
Ёқаверсанг тош ҳам ёнар,
Тошдан қаттиқ бош ҳам ёнар.
Ёр ишқида аравамни
Ўтин қилдим, Шош ҳам ёнар. 

* * *
Эй дўст!
Баланд тоғлар ортида гўзал водий бор,
Унга кетмоқни мен қилдим ихтиёр.
Бир йўловчи чиқиб олдимдан, деди:
— Сенинг водийингга келмоқдаман зор... 

* * *
Эй дўст!
Бугунга буғдойим бор, эртамга Худойим бор,
Худойимга ҳар куни дилимда дуойим бор.
Молу мулк деб кеча-кундуз чопмадим,
Чопганларнинг ҳолини кўп кўрган дунёйим бор.