Ичи чиркин, таши тилло ажиб васвас экан очун,
Қутулмоқлик йўлин нафсни маломатлар қилиб топдим.

Ибодат этгали дилдан риё исёнини қувдим,
Қироат лаззатин Қуръон тиловатлар қилиб топдим.

Магар рўзғор ғами бирла эландим халққамас, Ҳаққа
Ҳалол ризқни ҳалол касбу тижоратлар қилиб топдим.

Бу кенг дунё кўзимга тор кўринган кезлари минг бор
Кўнгил юмшоқлигин хайру саховатлар қилиб топдим.

Ҳидоятсиз ҳақиқатни тан олмоқ ҳеч иложсиздир,
Ҳидоятни Худога чин муножотлар қилиб топдим.

Бу дунё молидин кўнгил узиб, ухро тожин кийдим,
Ғанийликнинг сирин сабру қаноатлар қилиб топдим.

Работи эски бу дунё қолар биздан-да тез кунда,
Мана исбот — мозорларни зиёратлар қилиб топдим.

Муғанний, кел бу дунёнинг ўйин-кулгусидан кечгин,
Йўқотган фурсатим қадрин фаросатлар қилиб топдим.